Ársþing KKÍ verður haldið á Ísafirði um helgina. Formlegt þinghald hefst kl. 10:00 í fyrramálið, laugardagsmorgun, en gert er ráð fyrir að þinginu ljúki um hádegi á sunnudag ef tímaáætlun stenst.

Fjölmörg mál verða til umfjöllunar á þinginu, en gera má ráð fyrir að þau mál sem varða fjölda erlendra leikmanna í Intersport-deildinni og önnur mál tengd deildinni verði fyrirferðarmest.

Hægt er að nálgast þingskjöl og ársskýrslu KKÍ hér á vefnum.

Búast er við fjölmenni á þingið og málefnalegum umræðum um þau álitamál sem efst eru á baugi í hreyfingunni, en þingið er sá vettvangur sem aðildarfélög KKÍ hafa til að gera breytingar á lögum og reglum sambandsins.

Það er Körfuknattleiksfélag Ísafjarðar sem hefur veg og vanda að undirbúningi þingsins. Félagið á 40 ára afmæli á þessu ári og af því tilefni verður hátíðarkvöldverður með þingfulltrúum á laugardagskvöld.


Samkv. Lögum KKÍ eru störf körfuknattleiksþingsins eftirfarandi:

1. Þingsetning.
2. Kosning starfsmanna:
a) Kosning kjörbréfanefndar.
b) Kosning fyrsta og annars þingforseta.
c) Kosning fyrsta og annars þingritara.
3. Kosning fastra nefnda:
a) Fjárhagsnefnd
b) Laga- og leikreglnanefnd.
c) Allsherjarnefnd.
Nefndir þessar eru skipaðar þremur mönnum hver og kjósa þær sér formann.
4. Fráfarandi stjórn gefur skýrslu.
5. Gjaldkeri leggur fram endurskoðaða reikninga sambandsins til samþykktar.
6. Stjórnin leggur fram fjárhagsáætlanir fyrir næsta ár.
7. Lagðar fram laga- og leikreglnabreytingar þær, sem borist hafa til stjórnarinnar.
8. Teknar til umræðu aðrar tillögur og önnur mál, sem borist hafa til stjórnarinnar.

- ÞINGHLÉ -

9. Nefndarálit og tillögur og atkvæðagreiðslur um þær.
10. Önnur mál.
11. Kosning formanns.
12. Kosning þriggja meðstjórnenda til tveggja ára og þriggja manna varastjórn til eins árs.
13. Kosning fimm manna í dómstól KKÍ til þriggja ára.
14. Kosning tveggja manna í aganefnd og tveggja til vara
15. Kosning þriggja aðila í félagaskiptanefnd og þriggja til vara.
16. Kosning tveggja endurskoðenda.
17. Kosning fulltrúa á Íþróttaþing.
18. Þingfundargerðir lesnar og staðfestar.
19. Þingslit.