Fyrsta tvíþrautarkeppni þjálfara á vegum KKÍ var haldið í húsakynnum KR-inga að Frostaskjóli föstudaginn 15. apríl sl.
Tvíþrautin saman stendur af skriflegri og verklegri keppni þar sem þjálfarar þurftu annars vegar að svara 20 spurningum tengdum körfubolta á 3 mínútum og reyna fyrir sér í ýmsum skotþrautum.

Í tengslum við keppnina voru haldnir þrír fyrirlestrar: Ólafur Rafnsson, formaður KKÍ, hélt erindi um körfuboltann í Evrópu, Gísli Sigurðarson og Rúnar Pálmarsson, nemar við Íþróttakennaraskóla Íslands að Laugarvatni, héldu erindi um lokaritgerð sína sem fjallar um endurvakningu Félags körfuknattleiksþjálfara og Brynjar Karl Sigurðsson kynnti Sideline Sports.

Tvíkeppnin var gífurlega spennandi og fór svo að Henning Henningsson, þjálfari Grindavíkur kvenna bar sigurorð af Grétu M. Grétarsdóttur, þjálfara KR kvenna og Hlyn Skúla Auðunsson, þjálfara U16 landsliðs kvenna sem urðu í öðru og þriðja sæti. Gréta, sem var eini kvenkyns þjálfarinn sem tók þátt í keppninni, gaf strákunum ekkert eftir hvorki í bóklega né verklega hluta keppninnar, þó fór svo að lokum að Henning tryggði sigurinn með skoti frá miðju!