9. flokkur kvenna hjá Haukum og 10. flokkur karla hjá Njarðvík tryggðu sér í morgun Íslandsmeistaratitla í sínum flokkum. Haukar unnu bikarmeistara Grindavíkur, 39-34, í úrslitaleik 9. flokks kvenna en Grindavík hafði einmitt betur í bikarúrslitaleiknum, 41-49, fyrr í vetur. Njarðvíkurliðið vann Breiðablik, 85-56, í úrslitaleik 10. flokks karla en Njarðvík vann einnig bikarinn fyrr í vetur eftir 75-49 sigur á Snæfelli.

Haukaliðið hafði forustu nær allan leikinn, náði mest 8 stiga forskoti í fyrri hálfleik og leiddi með fimm stigum í hálfleik, 19-14. Grindavík minnkaði muninn niður í tvö stig í seinni hálfleik en nær komust þær ekki. Þetta er í fyrsta sinn sem 1990-árgangurinn hjá Grindavík verður ekki Íslandsmeistari.

Ragna Margrét Brynjarsdóttir var með 12 stig og 21 frákast fyrir Hauka, Klara Guðmundsdóttir skoraði 12 stig, Kristín Fjóla Reynisdóttir var með 8 stig og 10 fráköst og þá skoraði Guðrún Emilsdóttir 7 stig og tók 9 fráköst. Haukar unnu fráköstin, 47-33 og munaði um minna.
Hjá Grindavík var Alma Rut Garðarsdóttir með 15 stig, 8 stolna bolta og 6 fráköst og Íris Sverrisdóttir skoraði 8 stig og Elínborg Ingvarsdóttir var með 5 stig, 12 fráköst og 4 stolna bolta en Girndavíkurliðið stal alls 18 boltum í leiknum.

Njarðvík stakk af um miðjan fyrri hálfleik í úrslitaleik 10. flokks karla þegar liðið skoraði 17 stig í röð og breytti stöðunni úr 17-15 í 34-15 og eftir það var leikurinn í þeirra höndum en staðan var 43-27 í hálfleik. Breiðabliksstrákarnir voru að ná sínum besta árangri í þessum árgangi og stóðu sig vel en átti samt lítið í hið gríðarlega sterka Njarðvíkurlið.

Rúnar Ingi Erlingsson átti mjög góðan dag hjá Njarðvík, skoraði 23 stig, stal 7 boltum og gaf 7 stoðsendingar án þess að tapa einum einasta bolta. Friðrik Guðni Óskarsson var með 16 stig og 10 fráköst, Ragnar Ólafsson skoraði 15 stig og gaf 11 stoðsendingar og þá var Hjörtur Hrafn Einarsson með 15 stig, 8 fráköst og 4 stoðsendingar.
Hjá Breiðablik skoruðu þeir Hreinn Birgisson og Hjörtur Halldórsson báðir 11 stig og voru stigahæstir.

1989-árangurinn hjá Njarðvík er sá fyrsti í sögunni sem vinnur alla sjö titlana sem eru í boði á grunnskólaaldrinum. Auk þessa vann flokkurinn Íslands- og Bikarmeistaratitil í 9. flokki upp fyrir sig 2003 sem og bikarmeistaratitil í 11. flokki upp fyrir sig í vetur. Þá urðu strákarnir Norðurlandameistarar þegar þeir unnu Scania Cup tvö ár í röð, 2003 og 2004.

Titlar 1989 árgangsins hjá Njarðvík:
Minnibolti karla (Íslandsmeistari 2001)
7. flokkur karla (Íslandsmeistari 2002)
8. flokkur karla (Íslandsmeistari 2003)
9. flokkur karla (Íslandsmeistari og bikarmeistari 2004)
10. flokkur karla (Íslandsmeistari og bikarmeistari 2005)