Í gær var haldinn formannafundur Íþrótta- og ólympíusambands Íslands í Íþróttamiðstöðinni í Laugardal. Fundinn sátu formenn hinna 23 sérsambanda ÍSÍ og 27 héraðssambanda og íþróttabandalaga innan vébanda ÍSÍ. Fyrir hönd KKÍ sótti fundinn Ólafur Rafnsson, formaður sambandsins.

Meðal helstu málefna fundarins voru m.a. skýrsla vinnuhóps um hagkvæmni þess að sameina ÍSÍ og UMFÍ í ein heildarsamtök, skýrsla aðalfararstjóra frá Ólympíuleikunum í Sydney, umræður um tryggingarmál íþróttahreyfingarinnar, og lagðar voru fram ákvarðanir framkvæmdastjórnar um útbreiðslustyrki ÍSÍ til sambandsaðila. Jafnframt voru lagðir fram ársreikningar Íslenskra getrauna og Íslenskrar getspár, auk þinggerðar síðasta Íþróttaþings sem haldið var á Akureyri í mars s.l.