Erlendu úrvalsliðin unnu tvo örugga sigra á íslensku liðunum í Stjörnuleikjum karla og kvenna sem fóru fram í Valsheimilinu á Hlíðarenda í dag. Lið Sverris Þórs Sverrissonar vann 21 stiga sigur á landsliðinu, 83-62, í kvennaleiknum og bandarísku leikmennirnir unnu íslensku strákana 134-113, í karlaleiknum.

Vera Janjic úr Njarðvík var valinn besti leikmaður kvennaleiksins en Clifton Cook hjá Skallagrími nældi sér í sömu viðurkenningu í karlaleiknum. Vera var með 8 stig, 5 stoðsendingar og 5 fráköst á þeim 24 mínútum sem hún spilaði en Clifton Cook var með 20 stig og 6 stoðsendingar á sinni 21 mínútu og þarf af hitti hann úr 6 af 7 þriggja skotum sínum.

Birna Valgarðsdóttir úr Keflavík vann þriggja stiga skotkeppnina hjá konunum, fékk alls 13 stig, tveimur stigum meira en félagi hennar í Keflavíkurliðinu, Anna María Sveinsdóttir. Þær Alda Leif Jónsdóttir úr ÍS og Sólveig Gunnlaugsdóttir úr Grindavík voru síðan jafnar í þriðja sætinu með tíu stig hvor.

Magnús Þór Gunnarsson hóf þriggja stiga keppnina og fékk 13 stig og þótt að níu aðrir reyndu sig á eftir honum tókst engum að jafna árangur hans. Matt Sayman úr Njarðvík var næstur því, hann fékk 12 stig en síðasta skot hans sem fór rétta leið og hefði tryggt honum sigurinn kom eftir að tíminn rann út og var því dæmt ógilt. John Waller úr Haukum var þriðji með 11 stig og fjórði var síðan Baldur Ingi Jónasson úr KFÍ með 10 stig.

Anthony Glover úr Keflavík vann troðslukeppnina eftir að hafa fengið hörðustu samkeppnina frá Valsmanninum og heimamanninum Matthíasi Ásgeirssyni sem fékk sérstök tilþrifaverðlaun í lokin. Glover hlaut 26 stig í úrslitunum, sex fleiri stig en Matthías, þriðji var Chris Woods hjá Hamri/Selfoss með 12 og Clifton Cook kom síðan fjórði með 11 stig.

Þetta var 18. Stjörnuleikurinn sem KKÍ heldur en sá fyrsti fór fram í Valsheimilinu fyrir rétt tæpum sautján árum síðan, nánar til getið 27. janúar 1988 í þá nýbyggðu íþróttahúsi Vals á Hlíðarenda. Það má finna margskonar upplýsingar um sögu Stjörnuleiksins hér.

Myndir frá stjörnuleikjunum.