Sverrir Scheving Thorsteinsson leikmaður KR b í 2. deildinni hefur verið dæmdur í fjögurra leikja bann af aganefnd KKÍ eins og fram kom í frétt hér á síðunni í gær. Vegna þeirrar fréttar er dómsorð aganefndar birt hér orðrétt.

Sverrir var kærður fyrir að hafa veist að dómara í leik Reynis S. og KR b í 2. deild karla sl. föstudag. Var honum þá vikið samstundis af leikvelli.

Dómsorð aganefndar er sem hér segir:
Aganefnd KKÍ hefur tekið fyrir neðangreinda kæru Kristins Óskarssonar á hendur leikmanni nr. 8 hjá KR b, Sverri Sch. Thorsteinssyni í leik Reynis Sandgerði og KR b, sem fram fór þann 17/11 sl.

Aganefnd hafa borist tvö bréf frá hinum kærða, þar sem hann lýsir atburðum frá sinni hlið. Aganefnd hefur einnig rætt við báða dómara leiksins, þá Kristin og Þröst Ástþórsson um þeirra hlið á atvikum hins kærða atburðar.

Úrskurður:
Að teknu tilliti til þess sem að framan greinir er Sverrir Sch Thorsteinsson leikmaður KR b úrskurðaður í 4. leikja bann í samræmi við b lið 4. greinar reglugerðar um Aganefnd KKÍ.

Sverrir byrjar að taka bann sitt frá og með hádegi næsta föstudag.