Sunnudaginn 3. október fer meistarakeppni KKÍ fram í tíunda sinn . Að þessu sinni verður leikið í Keflavík, heimavelli Íslandsmeistara karla og kvenna.

Í kvennaflokki mætast Íslands- og bikarmeistarar Keflavíkur og silfur lið bikarkeppninnar - KR. Leikurinn hefst kl. 17:00. Liðin hafa verið tvö af bestu liðum landsins undanfarin ár og marga hildi háð. Bikarúrslitaleikurinn var æsispennandi og má vænta þess að eins verði um leikinn á sunnuudag.

Leikinn dæma þeir Sigmundur Már Herbertsson og Halldór Geir Jensson.

Karlaleikurinn er viðureign Íslands- og bikarmeistara Keflavíkur og silfurliðs Njarðvíkur í bikarkeppninni. Leikurinn hefst kl. 19:15. Þessi tvö lið eru tvö af bestu liðum Norðurlanda, Keflvíkingar urðu norðurlandameistarar félagsliða fyrir stuttu og á sama tíma unnu Njarðvíkingar “Knock Out Cup” 2004 í Danmörku. Því má búast við hörkuleik eins og jafnan þegar þessi lið mætast.

Leikinn dæma þeir Rögnvaldur Hreiðarsson og Erlingur Snær Erlingsson.

Frá upphafi keppninnar hefur KKÍ styrk ýmis málefni og leikirnir hafa því verið ágóðaleikir. Að þessi sinni eru það “Félag MND sjúklinga” sem fær allan ágóða af leikjunum.

Nánar um meistarakeppnina

Hér er um 150. leik Keflavíkur og Njarðvíkur að ræða. Ítarleg umfjöllum um leikinn er á vef Keflavíkur.