Það verður spilað til úrslita á Reykjanesmóti karla á Ásvöllum í kvöld. Haukar og Keflavík spila þá um þriðja sætið klukkan 19.00 og Njarðvík og Grindavík spila síðan til úrslita klukkan 21.00 en liðin hafa þegar lokið þremur umferðum þar sem allir spiluðu við alla. Njarðvík endaði þar efst, Grindavík varð í öðru sæti, Haukar í því þriðja og Keflavík rak lestina.

Athygli er vakinn á því að leikirnir fara fram klukkan sjö og níu en ekki klukkan fimm og sjö eins og þeir voru settir fyrst á þegar úrslitaleikirnir áttu að fara fram á sunnudegi.

Þessi sömu lið mættust einmitt í síðustu umferð sem fór fram í Njarðvík en þá unnu Haukar lið Keflavíkur 86-80 og Njarðvíkingar unnu lið Grindvíkinga með einu stigi, 78-77. Keflavík varð Reykjanesmeistari í fyrra eftir sigur á Haukum í úrslitaleik.

Öll liðin eru komin með bandarísku leikmenn sína til landsins og tefla því fram sínu sterkustu liðum á Ásvöllum í kvöld. Það má því búast við spennandi og skemmitlegum leikjum í kvöld.