Jón Arnór Stefánsson landsliðsmaður leikur sinn fyrsta leik á Íslandi í tæp þrjú ár á sunnudaginn þegar hann leikur með íslenska landsliðinu gegn því rúmenska. Ekki er útlit fyrir að Jón Arnór leiki aftur hér á landi í bráð, en hann hefur sem kunnugt er gert samning við rússenska félagið Dynamo St. Petersburg.

Jón Arnór lék með KR í gegnum alla yngri flokkana og vann fjöldan allan af Íslandsmeistaratitilum. Hann byrjaði að leika með meistaraflokki KR keppnistímabilið 1999-2000 þegar KR tryggði sér Íslandsmeistaratitilinn. Hann lék með KR tvö næstu keppnistímabil en hél til Þýskalands haustið 2002 þar sem hann gekk til liðs við Trier. Sl. haust gerði Jón Arnór samning við Dallas Mavericks í NBA-deildinni, en hann fékk ekkert að spreyta sig með liðinu á tímabilinu. Hann tók þátt í sumardeild NBA sl. sumar með liði Dallas og stóð sig mjög vel.

Í haust afréð hann að söðla um og leika í Evrópu um skeið. Hann gekk til liðs við nýstofnað félag, Dynamo, í St. Pétursborg í Rússlandi. Félagið þykir líklegt til afreka í rússnesku deildinni og Evrópukeppninni í vetur. Hugur Jóns Arnór stefnir þó til að leika á ný í NBA-deildinni.

Á morgun er því einstakt tækifæri á að sjá þennan snjalla leikmann leika hér á landi, tækifæri sem ekki gefst aftur í bráð.

Forsalan er í fullum gangi á Select-stöðvunum við Birkimel og Vesturlandsveg, sem og í íþróttahúsinu í Keflavík.