Danskir fjölmiðlar hafa í dag verið að velta leik Dana og Íslendinga fyrir sér. Århus Stiftidende hefur spjallað við nokkra leikmenn og þeir tala allir um að Íslendingar leiki "run og gun" bolta, hlaupi hratt og skjóti fljótt svo það sé mikilvægt fyrir Dani að vera vakandi í vörninni. Jonas Buur segir að það verði svekkjandi ef Danir vinna ekki, þeir séu stærri og sterkari og eigi að vinna.
Þá kemur einnig fram á heimasíðu Åbyhøj og er skrifað af Thomas Bilde sem kemur til með að lýsa leiknum í sjónvarpi að það muni vanta 3 stór nöfn í danska liðið. Christian Drejer og Michael Dahl Andersen fá ekki frí frá liðum sínum og Nicolai Iversen er nýbúinn að semja við nýtt félag á Spáni og Allan Foss landsliðsþjálfari vill ekki trufla hann á undirbúningstímabili hjá nýju félagi. Thomas Bilde er einnig að velta íslenska liðinu fyrir sér og þá sérstaklega Jóni Arnóri, hann talar um að Jón hafi lítið æft með íslenska liðinu en sé búinn að vera með nýja félaginu sínu, Dynamo St. Petersburg, í æfingamóti á Ítalíu. Það sé svo spurning hvort hann breyti til betri eða verri vegar fyrir íslenska liðið.
Í Horsens folkeblad er talað um að Mikkel Langager, miðherji danska landsliðsins og Horsens IC, sé meiddur og verði líklegast ekki með. Blaðamaður Horsens folkeblad gengur út frá því að byrjunarlið Dana hefði verið skipað þeim Jesper Sörensen, Martin Thuesen, Jens Jenssen, Chris Christoffersen og Mikkel Langager en þar sem Langager er meiddur þá muni Ndjadi Kingombe leysa hann af. Langager segir í viðtali við blaðið að danska liðið eigi að vera betra en það íslenska. Suma daga stendur íslenska liðið í þeim bestu en aðra daga tapar það fyrir lélegri liðum. Hann talar um eins og aðrir Danir að Íslendingar spili hratt og skjóti fljótt. En segir þó að eitt geti menn verið öruggir með og það er að íslenska liðið gefst aldrei upp. Þeir eigi oft á brattann að sækja en þeir berjist til síðasta blóðdropa.