Haustfagnaður körfuknattleiksmanna verður haldinn næstkomandi laugardag í Jósölum, hinum glæsilegu veislusölum Hestamiðstöðvar Íshesta við Kaldárselsveg í Hafnarfirði. Fagnaðurinn verður laugardaginn 18. nóvember. Húsið opnar kl. 19.30 með hanastéli og hefst borðhald kl. 20.30.

Haustfagnaðurinn, sem haldinn var í fyrsta sinn fyrir ári, er skemmtun þar sem eldri og yngri kynslóðir körfuknattleiksfólks mæta og eiga saman kvöldstund, og rifja upp gamla tíma úr starfi og leik, hvort sem menn voru þar sem stjórnarmenn, leikmenn, þjálfarar, dómarar eða aðrir velunnarar íþróttarinnar.

Veislustjórar verða tveir þjóðþekktir körfuknattleikssnillingar, þeir Einar Bollason og Kolbeinn Kristinsson.

Undirbúningsnefnd, undir stjórn Páls Júlíussonar fyrrv. formanns KKÍ, hefur unnið að skipulagningu fagnaðarins, og er stefnt að því að gera sem glæsilegast og eftirminnilegast. Ekki er um að ræða fjáröflunarsamkomu, heldur hefur þvert á móti verið reynt að halda miðaverði í hófi – og verður það nú kr. 3.400,- pr. mann. Miðinn gildir jafnframt á landsleiki Íslands gegn Úkraínu og Slóveníu í nóvember. Hægt er að hafa samband við Pál í síma 861-8262 eða við skrifstofu KKÍ í síma 568-5949 og skrá sig á hófið.

Við vonumst til að sjá ykkur öll hress á haustfagnaðinum, og að okkur takist að skapa skemmtilega stemmningu einstakra félaga og að gera þennan fagnað að föstum árlegum viðburði á dagatali körfuknattleiksfólks.