Með sigri sínum á Makedóníu í gær, 93-88, í framlengdum leik í B-deild Evrópumóts U-16 ára landsliða pilta, brutu íslensku strákarnir blað í íslenskri körfuknattleikssögu. Í fyrsta skipti náði Ísland að leggja eitt af fyrrum lýðveldum Júgóslavíu að velli í körfuknattleik og er þá átt við öll landslið áháð aldri eða kyni.

Ísland eigir nú möguleika á sæti meðal þeirra bestu í U-16 ára aldursflokki í Evrópu, A-deildinni á næsta ári. Varla þarf að taka fram að þar á engin smáþjóð sæti í ár. Frakkar urðu Evrópumeistarar eftir sigur á Rússum í úrslitaleik. Önnur ríki sem áttu lið í A-deildinni í ár voru Slóvenía, Pólland, Ísrael, Serbía&Svartfjallaland, Ítalíu, Litháen, Georgía, Tyrkland, Króatíu, Lettland, Spánn, Grikkland, Belgía og Þýskaland. Samkvæmt vef FIBA Europe lítur út fyrir að Þýskaland og Pólland hafi fallið í B-deildina fyrir næsta ár.