Íslenska A landsliðið leikur sinn 400. landsleik í kvöld þegar þeir mæta Pólverjum í Keflavík kl 20.
Í þessum 399 leikjum sem leiknir hafa verið hafa 175 leikmenn komið við sögu og sá 176. bætist í hópinn í kvöld þegar Halldór Halldórsson verður með í fyrsta skipti.

Það var 16. maí 1959 sem íslenskt landslið í körfuknattleik atti kappi við Dani í Kaupmannahöfn, Ásgeir Guðmundsson var þjálfari liðsins sem tapaði 38-41.
Það var svo 21 ári seinn sem 100. leikurinn var leikinn en það var á Norðurlandamóti í Bærum í Noregi þegar leikið var gegn heimamönnum. Leikurinn vannst 83-58 og Einar Bollason stýrði liðinu. Hann var enn við stjórnvölinn, ásamt Gunnari Þorvarðarsyni, í 200. leiknum sem leikinn var í Lausanne í Sviss 12. september 1987. Leikurinn var liður í undankeppni EM og var gegn heimamönnum í Sviss, en Svisslendingar unnu 112-100.
300. leikurinn var svo á Smáþjóðaleikunum í Lúxemborg 31. maí 1995. Torfi Magnússon og Jón Sigurðsson vor nú þjálfarar og leikið var gegn Andorra þar sem 4 stiga sigur vannst, 83-79.

Sigurður Ingimundarson hefur tilkynnt hópinn fyrir 400. leikinn sem fram fer í kvöld
Hópurinn er þannig skipaður:
Nafn Félag Hæð Aldur A-leikir

Eiríkur Önundarson ÍR 186 30 21
Fannar Ólafsson Ase Dukas 204 26 42
Friðrik Stefánsson Njarðvík 204 28 73
Halldór Halldórson Keflavík 200 20 Nýliði
Hlynur Bæringsson Snæfell 200 22 8
Jakob Sigurðsson BSU 194 22 7
Lárus Jónsson Hamar 180 26 3
Magnús Gunnarsson Keflavík 184 23 17
Páll Kristinsson Njarðvík 202 28 47
Páll Axel Vilbergsson Grindavík 196 26 42 fyrirliði
Pálmi Sigurgeirsson Snæfell 190 26 7
Sigurður Þorvaldsson Snæfell 201 24 13