Ívar Ásgrímsson, þjálfari var allt annað en ánægður með leik íslensku stelplnanna gegn Azerbaidjan í gær en tapið í þeim leik breytti hinsvegar engu um það að úrslitaleikur riðilsins er gegn Möltu í dag. Leikurinn hefst klukkan 14.30 að íslenskum tíma og fylgst verður með honum á kki.is. Ívar býst við hörkuleik en þetta sé leikur sem íslensku stelpurnar eiga að vinna. Mótherjar í leik um sæti á morgun verða annaðhvort Lúxemborg í úrslitaleiknum (sigur) eða við Armeníu (tap) um 3. sætið.

"Þetta var jafn lélegur leikur og fyrstu tveir voru góðir," sagði Ívar Ásgrímsson um tapleikinn gegn Azerbaidjan í gær. "Það var eins og stelpurnar hefðu ofmetnast eftir þessa tvo stóru sigra og haldið að það væri auðvelt að klára leikinn sem varð þeim síðan að falli. Það eina jákvæða við leikinn var kannski það og úrslitin skiptu okkur engu máli því Möltuleikurinn var alltaf úrslitaleikur riðilsins. Við að sjálfsögðu stefndum að fara taplausar í gegnum mótið en nú skiptir öllu máli að komast í úrslitaleikinn," sagði Ívar.

Ívar og stelpurnar eru búin að fara vel yfir málin og ekkert annað en sigur á Möltu í dag eru ásættanleg úrslit. "Það er ljóst að við spilum annaðhvort um 1. eða 3. sætið. Malta er með gott lið sem spilar skynsamlega og leikur liðsins er mjög skipulagður. Þær byggja allt á tveimur góðum leikmönnum, leikstjórnanda og sterkum miðherja. Við eigum að vinna þennan leik ef að stelpurnar spila eins og þær geta best. Þær þurfa samt að ná upp leikgleðinni og spila saman sem lið líkt og í fyrstu tveimur leikjunum og ef það tekst eigum við að vera sterkari aðilinn í þessum leik í dag," sagði Ívar nýkominn af fundi með stelpunum þar sem hann setti fram leikskipulag dagsins.

"Ég býst við að Möltustelpurnar reyni að hægja á leiknum og nýta skotklukkuna eins og gekk vel hjá Azerbaidjan í gær. Við þurfum ad bregðast rétt við því og vonandi var tapið í gær það spark í rassinn sem stelpurnar þurftu til að klára mótið," sagði Ívar að lokum.