KKÍ hélt þjálfaranámskeið um síðustu helgi í Ásgarði, Garðabæ. Námskeiðið er liður í nýju menntakerfi KKÍ.

Námskeiðið var stig 2.a sem gildir einnig til endurmenntunar og mun nýtast þjálfurum þegar þeir verða metnir inn í menntakerfið. Alls voru 11 fyrirlestrar sem voru mjög fjölbreyttir fyrir þá 50 þjálfara sem voru á námskeiðinu. Aðalfyrirlesari námskeiðsins var Janez Drvaric frá Slóveníu, en hann er mjög virtur FIBA fyrirlesari sem hefur haldið námskeið um allan heim.

Janez Drvaric er hættur þjálfun en á árum áður var hann mjög virtur þjálfari í fyrrum Júgóslavíu þar sem hann þjálfaði meðal annars A-landslið og þjálfaði leikmenn á borð við Drazen Petrovic, Vlade Divac og Toni Kukoc. Aðrir fyrirlesarar á námskeiðinu voru Ágúst Björgvinsson með kynningu á menntakerfi KKÍ, Borce Ilievski talaði um sókn með boltahindrun, Einar Árni Jóhannsson var með hraðupphlaupsæfingar, Helgi Jónas Guðfinnsson talaði um þolþjálfun fyrir körfubolta, Israel Martin nýráðinn þjálfari Bakken Bears var með tvo fyrirlestra og talaði um uppbyggingu á varnar- og sóknarleik ásamt því að tala um „scouting“, og Lárus Jónsson talaði um vörn á boltahindrun.

Til að teljast hafa lokið KKÍ 2.a námskeiðinu þurfti að vera með 100% mætingu og standast krossapróf í lok námskeiðsins

Áhugasamir sem misstu af fyrirlestrunum geta keypt þá á 5.000 kr. Nánari upplýsingar veittar í gegnum tölvupóst á kki@kki.is.

Áætluð næstu þjálfaranámskeið KKÍ árið 2015:
KKÍ 1.a helgarnámskeið 28.-30. ágúst
KKÍ 1.b fjarnám í september (Leikreglur, saga og mótamál)
KKÍ 1.c helgarnámskeið 25.-27. september
KKÍ 2.b fjarnám / vettvangsnám frá 1. október og út tímabilið