Landsmót UMFÍ fór fram um helgina á Sauðárkróki. Keppt var í hinum ýmsu greinum og þar á meðal körfuknattleik, þar sem voru skráð til leiks 13 karlalið og 5 kvennalið. Keppni hófst á fimmtudag og lauk með úrslitaleikjum á sunnudag. ÍBR (ÍS) sigraði í kvennakeppninni með fullu húsi stiga en HSH (Snæfell) varð í öðru sæti eftir æsispennandi leik við HSK (Hamar) sem hafnaði í þriðja sæti. Í karlakeppninni léku HSH (Snæfell) og UMSK (Breiðablik) til úrslita og eftir að UMSK menn höfðu leitt fyrstu þrjá leikhlutana sigu HSH menn framúr í lokin og sigruðu og urðu Landsmótsmeistarar 2004. ÍBA (Þór Ak.) sigraði Njarðvík í leik um þriðja sæti og UMSS 2 (gamlir Tindstælingar) sigraði UMSS 1 (Tindastóll) í leik um fimmta sætið.