Fræðslu og kynningarfundur verður haldinn um “Sportmetrics” laugardagskvöldið 17. júlí í tengslum við Gullmót Breiðabliks í kvennaknattspyrnu. Fundurinn er opinn öllum og aðgangur er ókeypis.

Sportmetrics er sérhæfð þjálfunar og mælingaaðferð sem þróuð hefur verið til að fækka alvarlegum hnémeiðslum hjá stúlkum. Auðvelt er að yfirfæra aðferðirnar yfir á stráka en þörfin er meiri hjá stúlkum þar sem þær eru í mun meiri hættu, allt að 4-6 sinnum meiri.

Fjallað verður um orsakir hnémeiðsla og það sem gerir kynin ólík, hvað þarf að leggja áherslu á í styrktarþjálfun kvenna og leiðir til að koma Sportmetrics inn í íslenskt íþróttastarf.

Staður : Íþrótthúsið Smárinn í Kópavogi kl. 19.15
Fyrirlesari : Stefán Ólafsson sjúkraþjálfari MTc
Stefán kynnti sér þessar aðferðir í Bandaríkjunum í vor og er viðurkenndur kennari í þessari þjálfunaraðferð.

Stefán hefur sinnt endurhæfingu íþróttamanna frá 1990. Í seinni tíð hefur hann sérhæft sig í endurhæfingu á öxlum og hnjám. Hefur hann kennt á þjálfaranámsskeiðum ÍSÍ á Akureyri og um íþróttameiðsli og endurhæfingu hjá Endurmenntunarstofnun. Einnig hefur hann ritað greinar um þessi mál m.a með áherslu á börn og unglinga.

Nálgast má hluta af því á heimasíðu Eflingar sjúkraþjálfunar : eflingehf.is