Forráðamenn Dallas Mavericks hafa ákveðið að Jón Arnór Stefánsson verði einn þeirra leikmanna liðsins sem nýja NBA-liðið, Charlotte Bobcats, fær ekki möguleika á að semja við ef marka má frétt sem birtist í Dallas Morning News í dag.
Nánar er fjallað um málið á heimasíðu körfuknattleiksdeildar KR og á sport.is.

Þetta verða að teljast ánægjuleg tíðindi í meira lagi og ættu að gefa nokkuð góða hugmynd um það í hversu miklum metum Jón Arnór er hjá forráðamönnum Mavericks. Fyrirfram var rétt eins búist við því að Jón Arnór yrði Charlotte Bobcats aðgengilegur, en fyrirkomulagið varðandi nýliða í NBA-deildinni er þannig að þegar nýtt lið kemur inn í deildina þurfa hin liðin að merkja sér 8 leikmenn sem eru utan færis fyrir þetta nýja lið. Aðrir leikmenn eru hins vegar nýliðunum aðgengilegir og er þetta gert til þess að ný lið í deildinni eigi auðveldara með að fóta sig.

Charlotte Bobcats verða 30.liðið í NBA-deildinni og með tilkomu þeirra breytist deildarfyrirkomulagið. New Orleans Hornets færast yfir í Vesturdeildina, en Charlotte Bobcats koma inn í Austurdeildina. Deildunum tveimur, Austur- og Vesturdeild, verður frá og með næsta keppnistímabili skipt upp í þrjá fimm liða riðla og talsvert meira ber á svæðaskiptingu. Þannig kemur Atlantshafsriðillinn t.d. til með að samanstanda af Boston, New York, New Jersey, Philadelphia og Toronto. Liðin koma til með að spila tvöfalda umferð innan riðilsins, þrjár eða fjórar umferðar út í deildina og tvær umferðir á milli deilda. Sigurvegarar hvers riðils fyrir sig tryggja sér sæti í úrslitakeppninni og liðin sem fylgja þeim þangað eru þau lið sem ná bestum árangri á tímabilinu, óháð því í hvaða sæti þau lenda í sínum riðli. Það gæti s.s. gerst að aðeins eitt lið úr einum riðlinum komist í úrslitin, en öll liðin úr öðrum riðli.