Tillögur á ársþingi KKÍ hafa verið afgreiddar og voru niðurstöður sem hér segir.

Fjárhagsnefnd
Þingskjal nr. 5, er varðaði hækkun sektargreiðslna ef félög hefðu ekki dómara á sínum snærum, var fellt.
Þingskjal nr. 19, fjárhagsáætlun, var samþykkt með örlitlum breytingum.

Laganefnd
Þingskjal nr. 3 var fellt þar sem það var nánast samhljóma þingskjali nr. 6, sem þó gekk lengra.
Þingskjal nr. 6 var samþykkt óbreytt. 1. deild karla verður breytt þannig að efsta liðið fer beint upp í Úrvalsdeild. Lið 2 - 5 leika úrslitakeppni, þar sem eitt lið fylgir deildarmeisturunum upp um deild. Sæmdarheitið Íslandsmeistari er fellt út.
Þingskjal nr. 7 var samþykkt óbreytt. Íslandsmeistaratitill var felldur úr 2. deild kvenna og í staðinn kemur sæmdarheitið Deildarmeistari.
Þingskjal nr. 8 var samþykkt með breytingum. Unglingaflokkur kvenna var færður úr fjölliðamótum í deildarkeppni og leiktímanum breytt í 4*10 mínútur.
Þingskjal nr. 14 var samþykkt óbreytt. Nýjum lið var bætt við reglugerð um aganefnd. Ef aðila var ekki vísað af leikvelli en er kærður til aganefndar hefur aganefnd heimild til að beita viðurlögum skv. a) og b) lið.
Þingskjal nr. 15 var samþykkt óbreytt. Breytingar á reglugerð um aganefnd. Hættuleg framkoma eða líkamsmeiðingar við dómara eða starfsmenn leikja leiðir af sér a.m.k. þriggja leikja bann.
Þingskjal nr. 16 var samþykkt óbreytt. Breytingar á reglugerð um aganefnd. Tilkynna skal félagi hins kærða, í stað þess sem áður var þegar tilkynna átti hinum kærða.
Þingskjal nr. 18 var samþykkt óbreytt. Mótanefnd ákveður leikstað í öðrum flokkum en meistaraflokki, en ekki er krafa um hlutlausan völl.

Allsherjarnefnd
Þingskjal nr. 1 var samþykkt með breytingum. Tölfræði skal skilað úr 1. deild karla, 16 liða, 8 liða, undanúrslitum og úrslitum bikarkeppni KKÍ og fyrirtækjabikar KKÍ.
Þingskjal nr. 4 var fellt. Tillaga um að taka upp fastnúmerakerfi, númer 0-99.
Þingskjal nr. 9 (og breytingartillaga við hana) var fellt. Tillaga um að banna leikmenn utan Evrópu í 1. deild karla, 2. deild karla og 2. deild kvenna.
Þingskjal nr. 12 var samþykkt óbreytt - Venslasamningum skal skilað inn fyrir 5. janúar ár hvert.
Þingskjal nr. 13 var samþykkt óbreytt - Texti um heimaleikjagjald var felldur út úr grein 6. í reglugerð um körfuknattleiksmót, þar sem heimaleikjagjald var fellt niður fyrir nokkrum árum.
Þingskjal nr. 23 (var breytingartillaga við þingskjöl nr. 11, 17 og 20) var samþykkt með breytingum. Þetta þingskjal tekur á reglugerð um þátttöku í úrvalsdeild. Helstu breytingarnar voru eftirfarandi: Félög mega mest vera með tvo leikmenn utan Evrópu. Launaþaki er skipt þannig að heildarupphæð er 500.000 krónur á mánuði, og af því má mest nota 300.000 krónur í leikmenn utan Evrópu.

Reglugerðir verða uppfærðar á vefnum innan skamms.