Heimsóknir á kki.ís í október eru í dag orðnar 5.300 talsins og með sama áframhaldi gæti fjöldi heimsókna í þessum fyrsta mánuði keppnistímabilsins farið í 20 þúsund.

Þessar viðtökur eru fram úr björtustu vonum og sýna svo ekki verður um villst að máttur þessa miðils er mikill. Að sama skapi reynir á okkur hjá KKÍ að halda vefnum ferskum með nýjum fréttum reglulega og að úrslit leikja skili sér inn í mótahluta vefsins strax að leik loknum.

Því miður hafa úrslit og tölfræði leikja í Epson-deildinni ekki skilað sér inn með þeim hætti sem við vildum og netverjar gera kröfu um, þ.e.a.s. strax eftir leik. KKÍ hefur nú hrundið af stað átaki til að aðstoða félögin við innslátt þessara upplýsinga og munu næstu tvær umferðir, fimmtudag og sunnudag, verða notaðar til þess að koma þessu í lag.

Varðandi úrslit annarra leikja en í efstu deildum, þá eru þau sett inn um leið og skýrslur berast til KKÍ. Þeir sem vita úrslitin geta að sjálfsögðu sent okkur úrslitin í gegnum úrslitasíðurnar, þar sem stendur "senda úrslit" og við setjum úrslitin inn óstaðfest. Staðfest úrslit koma síðan þegar skýrsla berst.