Keflavík tryggði sér um helgina deildarmeistaratitilinn í 1. deild kvenna annað árið í röð og í áttunda sinn í tólf ára sögu núverandi fyrirkomulags. Keflavík vann KR, 73-57, og tap ÍS í Grindavík, 73-68, þýddi að Keflavík er komið með sex stiga forskot þegar aðeins fjögur stig eru eftir í pottinum. ÍS og KR keppa enn um annað sætið en ÍS er þar í mun betri stöðu og þarf bara að vinnan annan af þeim tveimur leikjum sem liðið á eftir.

Sigurinn á KR var níundi deildarsigur Keflavíkur í röð og jafnframt 14.sigur liðsins í röð í öllum keppnum en á þeirri sigurgöngu hafa Keflavíkurkonur tryggt sér þrjá titla, fyrirtækjabikarinn í desember, bikarinn í byrjun febrúar og loks deildarmeistaratitilinn um helgina.

Deildarmeistaratitlar í 1. deild kvenna 1993-2004:
2004 Keflavík (8)
2003 Keflavík (7)
2002 ÍS (1)
2001 KR (3)
2000 KR (2)
1999 KR (1)
1998 Keflavík (6)
1997 Keflavík (5)
1996 Keflavík (4)
1995 Keflavík (3)
1994 Keflavík (2)
1993 Keflavík (1)

Flestir deildarmeistaratitlar í 1. deild kvenna 1993-2004:
8 - Keflavík (1993-98, 2003, 2004)
3 - KR (1999, 2000, 2001)
1 - ÍS (2002)