Ráðist var með hrottalegum hætti að íslenska landsliðsmanninum Fannari Ólafssyni á samkomu í kjölfar bikarúrslitaleikja KKÍ og Lýsingar um síðustu helgi. Stjórn KKÍ fjallaði um málið á fundi sínum í gær, og vill senda Fannari baráttukveðjur með óskum um skjótan bata. Fannar er einhver skemmtilegasti og litríkasti leikmaður sem Ísland hefur átt, og er það von allra körfuknattleiksunnenda að honum verði sem fyrst unnt að ylja áhorfendum um hjartaræturnar á ný með skemmtilegum tilþrifum sínum og útgeislun á velli.

Stjórn KKÍ harmar umræddan atburð, en telur hann ekkert eiga skylt við viðureignir félaga í körfuknattleik. Vill stjórn KKÍ koma á framfæri þakklæti til stjórna körfuknattleiksdeilda Njarðvíkur og Keflavíkur fyrir drengileg samskipti að því leyti, og vísar til umfjöllunar á heimasíðum þeirra félaga. Viðkomandi brotamaður mun án efa fá viðeigandi meðferð sinna mála innan hins almenna opinbera réttarkerfis.

Körfuknattleikshreyfingunni er mikilvægast að Fannar Ólafsson nái fullum bata sem fyrst.

Stjórn KKÍ.