Aldrei hafa fleiri lönd sóst eftir að halda HM í körfubolta en fyrir keppnina sem haldin verður árið 2010. Alls hafa sjö lönd lýst því yfir að þau hyggist sækja um að halda keppnina. Þetta eru: Ástralía, Frakkland, Ítalía, Puerto Rico, Rússland, Serbía og Svartfjallaland og Tyrkland.

Heimsmeistarakeppnin er haldin á fjögurra ára fresti. Hún var fyrst haldin árið 1950. Júgóslavía (nú Serbía og Svartfjallaland) hefur oftast unnið heimsmeistaratitilinn eða fimm sinnum. Næst koma Bandaríkin og Sovétríkin sálugu með þrjá titla hvort land.

Vegna þess hve miklar framfarir hafa orðið í íþróttinni og sú staðreynd að körfubolti er vinsælasta innanhúss íþrótt heims, hefur verið ákveðið að fjölga þátttökuþjóðum í úrslitum HM úr 16 í 24.

Flest löndin munu krækja sér í farseðil á HM 2010 með góðum árangri í álfukeppnunum fimm sem fram fara sumarið 2009, en þar að auki eru fjögur laus sæti í boði, en það eru svokölluð "wild card" sæti. Næsta heimsmeistarakeppni karla fer fram í Japan árið 2006.