Helgi Magnússon landsliðsmaður tryggði Catawba College 91-90 sigur á Wingate-háskóla með þriggja stiga körfu þegar 25 sekúndur voru eftir af leik skólanna á miðvikudagskvöld.

Með sigrinum hefur Catawba sigrað í 6 leikjum en tapað 11 í það heila, en unnið 1 og tapað 3 í SAC-deildinni (NCAA Div. II). Helgi átti mjög góðan leik, skoraði 25 stig, þar af sex 3ja stiga körfur. Auk þess hirti hann 9 fráköst.

Þetta var tólfti sigur Catawba á Wingate í röð á heimavelli sínum, Goodman Gym í Salisbury í N-Karólínu.