Keflavíkingar mæta franska liðinu Dijon í fyrri/fyrsta leik liðanna um áframhaldandi þátttöku í bikarkeppni Evrópu ytra í kvöld kl. 20 að staðartíma. Annar leikurinn verður í Keflavík á föstudagskvöld kl. 20.30, og ef til oddaleiks kemur verður hann miðvikudaginn 28. janúar í Dijon.

Franska liðið varð fyrir áfalli fyrir helgina er Bandaríkjamaðurinn Lamont Barnes, sem liðið hafði nýlega ráðið í stað Derrick Davenport, lét ekki sjá sig í Frakklandi. Dijon átti að mæta Gravelines í frönsku deildinni um helgina, en Barnes mætti ekki.

Dijon er með undirritaðan samning við Barnes og veit ekki hvar hann er niðurkominn. Félagið á leik gegn Le Havre í frönsku deildinni á sunnudaginn auk leikjanna við Keflavík í kvöld og á föstudaginn. Félagið ætlar að leita fyrir sér með annan leikmann í stað huldumannsins Barnes.

Þess má geta að frestur til að skila leikmannalista fyrir Evrópukeppnina rann út 15. janúar og því nær liðið ekki að fylla skarð Barnes fyrir leikina við Keflavík.