Jakob Sigurðarson landsliðsmaður lék vel með skólaliði sínu, Birmingham Southern, á móti í San Francisco um helgina. Jakob var með 19 stig og 7,5 stoðsendingar að meðaltali í leik í mótinu. Þá var hann einnig með 66,6% nýtingu í 3ja stiga skotum og 100% nýtingu í vítum.

Á sunnudaginn tapaði Birmingham Southern fyrir Loyola-Chicago 71-74. Jakob var stigahæstur með 21 stig og 7 stoðsendingar í þeim leik. Í gær vann skólinn sigur á St. Peters 75-59. Jakob var stigahæstur í sínu liði ásamt öðrum leikmanni með 17 stig og hann var einnig með 8 stoðsendingar. Í síðari hálfleik þegar BSC var yfir 59-45 gerðu þeir Jakob og Helgi Margeirsson, sem gerði 3 stig í leiknum, hvor sína 3ja stiga körfuna og breyttu stöðunni í 65-45 og gerðu þar með út um leikinn.

Í síðasta deildarleik sínum fyrir jól vann BSC sigur á Nicholls State 88-80. Jakob var með 16 stig og 7 stoðsendingar í þeim leik. BSC hefur nú unnið 7 leiki og tapað 3 í það heila á keppnistímabilinu.