Körfuknattleikssamband Íslands skrifaði undir samninga við nýja samstarfsaðila á Sólon Bistro síðastliðin mánudag. Þá var boðið til fundar hér heima samhliða drætti FIBA Europe í París þegar dregið var í riðla fyrir Evrópukeppni karla næsta haust. 
Mikill meðbyr er nú í íslenskum körfuknattleik og er öflugt starf undanfarinna ára að skila sér. 

Það voru KPMG, Landsbankinn og Lykill sem voru kynntir til leiks sem nýjir samstarfsaðilar KKÍ og einnig framlengdi Lengjan sinn samstarfssamning við KKÍ.

,,Það er ómetanlegt fyrir körfuknattleikshreyfinguna að fá inn jafn öfluga samstarfsaðila og þessa aðila. Það er stórt ár framundan hjá okkur í körfuboltanum og þá ekki bara hjá karlalandsliðinu sem er að fara taka þátt í EM í fyrsta sinn. Kvennalandsliðið tekur þátt í undankeppni EM eftir nokkurra ára pásu ásamt því að fjögur yngri lið taka þátt í Evrópukeppninni næsta sumar. Einnig höldum við áfram með U20 ára verkefni karla og höfum nú bætt við U20 ára verkefni kvenna og því ljóst að næsta ár verður viðburðarríkt hjá okkur í körfuknattleikshreyfingunn,“ sagði Hannes S. Jónsson formaður KKÍ, sem var staddur dráttinn í París.


Þórmundur Jónatansson og Guðbjörg Norðfjörð við undirritunina

Það var Guðbjörg Norðfjörð, varaformaður KKÍ, sem undirritaði samningana fyrir hönd KKÍ og fulltrúar samstarfsaðila voru Sverrir Viðar Hauksson frá Lykli, Jóhanna Kristín Guðmundsdóttir markaðsstjóri KPMG, Þórmundur Jónatansson frá Landsbankanum, Inga Huld Sigurðardóttir markaðsstjóri Lengjunnar.