Í dag verður dregið í 16-liða úrslit karla og kvenna í Poweradebikarnum. Bikardrátturinn fer fram kl. 12 í Íþróttamiðstöðinni Laugardal í E-sal á þriðju hæð. SportTV.is sýnir beint frá drættinum á netinu.

Í gær áttust við Stjarnan-Haukar, KFÍ-Þór Þ. og FSu-Keflavík þar sem Stjarnan, Þór Þ. og Keflavík komust áfram.

15 lið eru skráð til leiks í keppni kvenna og 15 lið eru komin áfram hjá körlunum en einni viðureign verður ólokið og verða lið þess leiks, Sindri og Fjölnir, saman á einum miða í skálinni í dag og verður því dregið í 8 viðureignir hjá körlum og 7 hjá konum þar sem eitt lið situr hjá.

Það verða þau Gunnar Þorvarðarson og Svanhildur Guðlaugsdóttir sem munu draga í 16-liða úrslit karla og kvenna að þessu sinni en þau eru bæði fyrrum bikarmeistarar með Njarðvík og Haukum. Þess má einnig geta að þau eru foreldrar tveggja landsliðsmanna, Gunnar er faðir Loga Gunnarssonar og Svanhildur er móðir Helenu Sverrisdóttur.

Leikið verður helgina 5.-7. desember í 16-liða úrslitunum.