Það má segja að það verði nóg að gera hjá íslenskum leikmönnum út um allan heim í desember. KKI.is hefur tekið saman alla leikdaga íslenskra landsliðsmanna, og sem leika í efstu deild í sínu landi, í desember og kemur þá í ljós að lið þeirra eru að leika alla daga nema níu.

Af Íslendingum erlendis er það annars að frétta að Logi Gunnarsson lék sinn fyrsta leik eftir meiðsli á laugardaginn þegar Giessen heimsótti Karlsruhe. Logi varð fyrir því óláni að hrökkva aftur úr axlarlið og mun ekki leika næstu vikurnar. Karlruhe vann leikinn 82-76 eftir framlengdan leik, en Giessen leiddi með 10 stigum í 4. leikhluta. Logi lék í 35 mínútur í leiknum áður en hann meiddist og skoraði 4 stig en hann lék sem leikstjórnandi þar sem allir aðrir sem valda því hlutverki í liðinu eru meiddir. Og nú er Logi líka meiddur.

Signý Hermannsdóttir lék með liði sínu Isla de Tenerife í gær gegn Canal Isabel II og tapaði 58-66 eftir að hafa verið undir allan leikinn. Signý skoraði 11 stig fyrir Tenerife sem er í 8. sæti í deildinni.

Óðinn Ásgeirsson lék með Ulriken Eagels gegn Asker Aliens, sem eru norskir meistarar, um helgina og töpuðu Ulriken þriðja leik sínum á tímabilinu, 85-91 eftir æsispennandi lokamínútur. Óðinn stóð sig sem fyrr prýðilega, lék í 23 mínútur og skoraði 10 stig auk þess að taka 8 fráköst. Ulriken er í toppbaráttunni í Noregi en þar eru aðeins 8 lið í efstu deild.

Pavel Ermolinskij fór með liði sínu Vichy til Dijon og lék með unglingaliði félagsins sem sigraði leik sinn og skoraði Pavel 12 stig, tók 8 fráköst og gaf 5 stoðsendingar. Hann var svo í hópnum hjá aðalliðinu sem tapaði 91-95 en kom ekki við sögu í leiknum. Vichy er í 12. sæti í frönsku deildinni.
Vichy leikur í bikarkeppni Evrópu líkt og Keflavík, eru í A-riðli vesturdeildarinnar og hafa leikið 3 leiki og sigraði 2. Pavel hefur verið í hópnum í þessum leikjum og nú síðast þegar þeir sigruðu Clube Atletico frá Portúgal 80-78 kom Pavel inná og lék í 3 mínútur.