Íslensku stelpurnar í unglingalandsliði 18 ára og yngri byrjuðu vel á Promotion Cup sem hófst á Ásvöllum í dag. Íslenska liðið vann 82 stiga sigur á Gíbraltar, 97-15, í leik kattarins af músinni en það má búast við meiri mótstöðu frá liði Andorra sem er næsti mótherji liðsins.
Andorra tapaði fyrir Skotlandi í dag, 56-63, og leikur við íslenska liðið klukkan 19:00 á Ásvöllum annað kvöld. Fyrri leikur morgundagsins er viðureign Möltu og Gíbraltar.

Helena Sverrisdóttir var stigahæst í íslenska liðinu en hún gerði 18 stig, þremur fleiri en allt Gíbraltar-liðið og það þrátt fyrir að spila aðeins í 14 mínútur. Helena var auk þess með 7 fráköst og 6 stoðsendingar á þessum stutta tíma sem hún spilaði. Petrúnella Skúladóttir var næst stigahæst með 15 stig á 13 mínútum, Sigurlaug Guðmundsdóttir skoraði 10 stig og hitti úr öllum þremur þriggja stiga skotum sínum og Ösp Jóhannsdóttir var með 10 stig. Þá stóð Lilja Oddsdóttir sig mjög vel og var með 9 stig, 15 fráköst og 4 stolna bolta.

Alls tók íslenska liðið 50 sóknafráköst í leiknum, Lilja og Kristrún Sigurjónsdóttir voru báðar með 9 fráköst í sókn og sex leikmenn íslenska liðsins tóku fleiri sóknafráköst en allt Gíbraltar-liðið til samans en Gíbraltar tapaði fráköstunum 25-3 undir körfu íslenska liðsins.