Íslensku A-landsliðin unnu tvo góða sigra á Norðmönnum í Keflavík í kvöld en þjóðirnar leika alls sex vináttulandsleiki um helgina, þrjá í karlaflokki og þrjá í kvennaflokki. Konurnar unnu 16 stiga sigur, 67-51, í fyrri leiknum og karlarnir unnu upp 13 stiga forskot Norðmanna í byrjun síðasta leikhluta og unnu loks átta stiga sigur, 86-78.

Íslenska kvennalandsliðið byrjaði fyrsta heimaleikinn í sex ár af miklum krafti, frábær hittni (18 af 30, 60%) og góð samvinna (14 stoðsendingar) í fyrri hálfleik lögðu grunninn að 15 stiga forskoti í leikhléi, 44-29. Íslensku stelpurnar náðu ekki að fylgja eftir góðum sóknarleik í seinni hálfleik en sterk svæðisvörn sá til þess að munurinn hélst og norsku stelpurnar skoruðu aðeins 22 stig eftir hlé. Þetta var aðeins þriðji sigur íslenska kvennalandsliðsins á Norðurlandaþjóð frá upphafi en 67-51 sigur er gott veganesti fyrir stelpurnar í næstu tvo leiki.

Birna Valgarðsdóttir skoraði mest 17 stig fyrir íslenska liðið (8 stig í 2. leikhluta), Erla Þorsteinsdóttir var með 14 stig og 7 fráköst og Hildur Sigurðardóttir skoraði 9 stig og gaf 5 stoðsendingar. Allar tólf stelpurnar tóku þátt í leiknum, þær spiluðu á bilinu 8 til 23 mínútur, 11 þeirra skoruðu og sú tólfta, Svandís Sigurðardóttir, tók 6 fráköst og stal 2 boltum í sínum fyrsta landsleik.
Hjá Noregi voru stóru stelpurnar, Karianna Oysted (14 stig, 5 fráköst) og Kristina Tattersdill (11 stig, 8 fráköst, 5 stolnir) bestar en liðið hitti illa í leiknum (meðal annars aðeins 1 af 10 í þriggja) og náði sér ekki á strik í þessum leik.

Íslenska karlalandsliðið virtist vera með tapaðan leik þegar liðið var komið 13 stigum undir, 59-72, þegar sex mínútur voru eftir. En íslensku strákarnir gáfust ekki upp, unnu síðustu sex mínúturnar 27-6 og leikinn þar með 86-78. Afar slæm vítanýting um miðbik leiksins kostaði íslenska liðið frumkvæðið en liðið klikkaði á 13 af 15 vítaskotum á 21 mínútna kafla þar sem munurinn fór úr 31-19 fyrir Ísland í 51-61 fyrir Noreg.

Logi Gunnarsson kórónaði fínan leik sinn með því að skora 16 stig á síðustu sex mínútunum og alls 28 stig í leiknum en auk þess átti hann sjö stoðsendingar á félaga sína og tók niður sjö fráköst. Friðrik Stefánsson átti mjög góðan fyrri hálfleik þegar að hann skoraði 10 af 17 stigum sínum og tók niður átta fráköst en Friðrik fékk sína þriðju villu á fjórðu mínútur þriðja leikhluta (í stöðunni 51-52) og kom ekkert meira við sögu eftir það. Magnús Þór Gunnarsson setti niður helming þrista íslenska liðsins (4 af 8) og gerði 15 stig og þá var Baldur Ólafsson með 12 stig á 14 mínútum.

Hjá Norðmönnum átti Calix B. Ndiaye frábæran leik, gerði 28 stig og hitti úr 9 af 13 skotum sínum enda áttu Norðmenn lítið í íslenska liðið eftir að Ndiaye fékk sína fimmtu villu í stöðunni 64-72 fyrir Noreg og tæpar fimm mínútur voru eftir.

Næstu leikir liðanna eru á morgun í DHL-höllinni í Vesturbæ Reykjavíkur. Leikur kvennaliðsins hefst klukkan 14:30 en karlarnir hefja leik klukkan 16:30. Leikirnir á morgun verða sýndir í beinni á RÚV en einnig má geta þess að ókeypis er á leikina. Á sunnudaginn leika þessi lið síðan síðustu leiki sína á Ásvöllum. Kvennaliðin leika þá klukkan 18:00 en karlaliðin klukkan 20:00.