Sl. mánudag sendi körfuknattleiksdeild Hauka inn kæru á hendur körfuknattleiksdeild UMFN og krafðist þess að úrslit í leik UMFN b og Hauka B, sem fram fór sl. laugardag yrðu dæmd ógild. Haukar töldu að UMFN hefði teflt fram ólöglegum leikmanni í leiknum, Þorsteini Húnfjörð, hann væri einn af sjö leikjahæstu leikmönnum A-liðs félagsins. Dómstóll KKÍ kvað í dag upp dóm í málinu og er UMFN sýnknað af kröfu Hauka.

Ár 2003, fimmtudaginn 10. apríl, var í dómstóli Körfuknattleikssambands Íslands í málinu nr. 1/2003:

Körfuknattleiksdeild Hauka
gegn
körfuknattleiksdeild UMFN
uppkveðinn svohljóðandi d ó m u r :

Mál þetta dæmir Helgi I. Jónsson.

Kærandi skaut málinu til dómsins með bréfi dagsettu 7. apríl síðastliðinn og krefst þess að úrslit í leik b-liða málsaðila, sem fram fór í Íþróttahúsi Njarðvíkur 5. apríl 2003, verði ógilt og kæranda dæmdur sigur.

Kærði krefst þess að kærunni verði vísað frá.

Laugardaginn 5. apríl 2003 fór fram leikur milli B-liða aðila þessa máls í Íþróttahúsi Njarðvíkur. Meðal leikmanna kærða var Þorsteinn Ö. Húnfjörð, sem áður lék með körfuknattleiksliði Keflavíkur, en mun hafa skipt yfir í lið kærða í desember 2002.

Kærandi byggir á því að ofangreindur leikmaður hafi verið fastur maður í leikmannahópi kærða frá 6. desember 2002 og hafi hann leikið alla deildarleiki félagsins síðan félagaskipti hans frá körfuknatteiksliði Keflavíkur tóku gildi. Þar áður hafi hann leikið nokkra leiki með A-liði Keflavíkur. Samanlagt geri þetta 18 úrvalsdeildarleiki og þar með sé leikmaðurinn í hópi sjö leikjahæstu leikmanna kærða.

Um lagarök vísar kærandi til 22. gr. reglugerðar um körfuknattleiksmót.

Af hálfu kærða er því haldið fram að leikmaðurinn hafi aðeins leikið 14 leiki með A-liði kærða og sé hann því ekki einn af sjö leikjahæstu leikmönnum liðsins.

Niðurstaða máls þessa ræðst af túlkun á 22. gr. reglugerðar KKÍ um körfuknattleiksmót sem er svohljóðandi:

„II. deild karla skal skipuð þeim liðum sem ekki eiga sæti í úrvalsdeild eða I. deild. Ennfremur er öllum félögum innan KKÍ heimilt að senda B og C-lið í II. deild. B-lið skulu skipuð leikmönnum 20 ára og yngri. Auk þess er heimilt að tefla fram í B-liði tveim lekmönnum eldri en 20 ára. Sjö leikjahæstu leikmönnum A-liðs hverju sinni er ekki heimil þátttaka með B eða C-liði [...].

Kærandi reisir kröfur sínar á því að áðurnefndur leikmaður kærða hafi leikið samanlagt 18 leiki með liði Keflavíkur og kæranda. Dómurinn telur hins vegar að orðalagið „Sjö leikjahæstu leikmönnum A-liðs hverju sinni” í 22. gr. nefndrar reglugerðar verði ekki skilið á annan veg en þann að þar sé átt við þá leiki sem leikmenn viðkomandi liðs hafa spilað á keppnistímabilinu. Samkvæmt því teljast ekki með þeir A-liðs leikir, sem Þorsteinn Ö. Húnfjörð lék með liði Keflavíkur á keppnistímabilinu, áður en hann skipti yfir í lið kærða. Ber því að sýkna kærða af kröfum kæranda í máli þessu.

D ó m s o r ð :
Kærði, körfuknattleiksdeild Ungmennafélags Njarðvíkur, er sýkn af kröfum kæranda, körfuknattleiksdeildar Hauka, í máli þessu.